ལོ་ན་བགྲེས་པའི་ཕུན་ཚོགས་དབང་རྒྱལ།                  ༡ རང་ཡུལ་ནས་རྙེད་པའི་མེ་ལོང་ཆག་རོ་དེའི་ངོས་སུ ཁྱེད་ཀྱིས་འཛུམ་ཙམ་བྱས་ནས་ཡུན་རིང་དུ་བལྟས་ནའང གཉེར་མའི་ཁེངས་པའི་ང་རྒྱལ་གྱི་མགོ་བོ་དེ ཆུ་ཐིགས་བཞིན་ས་སྟེང་དུ་ཟགས་ནས་རིམ་བཞིན་མི་སྣང་བའི་ཚོར་བ་ཞིག་སྐྱེས་བྱུང ཨོ། ལོ་ན་བགྲེས་པའི་ཕུན་ཚོགས་དབང་རྒྱལ། ༢ ལོ་ངོ་འདི་དག་ལ། ཁྱེད་ཀྱིས་རང་གི་ཁང་བའི་ཕྱི་རོལ་ཏུ འབུ་སྲིན་བཞིན་འགུལ་བའི་རྣམ་ཤེས་ཀྱི་ཚོགས་ལ་ཅེར་ནས “མི་རྟག་པ། མི་རྟག་པ།”ཟེར་བར་དོན་སྙིང་ཅི་ལ་མེད། ༣ མངར་ཇ་ཧུབ་རེ་དང་མཉམ་དུ་ང་ཚོས་བརྗོད་བྱ་མང་པོ་ཞིག་ལབ་ནས བོད་ཅེས་པའི་རིགས་རྒྱུད་འདིའི་རྒྱུ་མཚན་སྨྲ་རུ་མེད་པ་དེ་དག་ཡིད་ལ་དྲན་ཐེངས་རེར ཁྱེད་ཀྱི་ཤ་ཁྲག་གི་རི་རབ་དེ་ལ་ས་འགུལ་ཆེན་པོ་ཞིག་རྒྱུགས （རི་བོང་གི་རྣ་ཅོག་དང་འདྲ་བའི་སྲང་ལམ་གྱི་གློག་ཞུ་དེ་དག་བཀར་རྗེས བོད་སྤོས་ཀྱི་དྲི་མས་ཁེབས་པའི་ཁང་མིག་དེའང ཁྱེད་ཀྱི་སྐྲ་ལོ་ནང་བཞིན་ཡོངས་སུ་དཀར་བོར་གྱུར་སོང） ༤ ང་འགྲོ་རན་པའི་དུས་ཚོད་དེ་ལ། དབུལ་ཕོངས་ཀྱིས་ཡོངས་སུ་མནར་བའི་སྡེ་བ་ཞིག་ལྟར པེ་ཅིང་གི་མཚན་མོ་འདི། སྐོམ་པས་གཟིར་བའི་སེང་གེ་ཞིག་དང་ཡེ་ནས་མི་འདྲ་བར མིག་ཆུའི་རྡོག་པ་བར་མེད་དུ་གཏོར་གྱིན་པའི་ཡུགས་ས་མ་ཞིག་གི རྒྱབ་ལྗོངས་ལས་ཡིད་ལ་གཞན་ཞིག་དྲན་གྱི་མི་འདུག ༦ བོད་ལ་དབང་བའི་ཕུན་ཚོགས་དབང་རྒྱལ། ད་དུང་མང་པོ་ཞིག་བརྗོད་འདོད་སྐྱེས་རུང་མགྲིན་པ་འགག་ནས་སྐད་ངག་མེད་ཀི མངོན་སུམ་མམ་རྨི་་ལམ་གང་ཡིན་མི་ཤེས་པའི་དགུན་དུས་འདིའི ཁེར་རྐྱང་དུ་འགྲོ་བའི་ལམ་ཁར ཕྱི་རོལ་གྱི་ཁ་བ་ཞུས་ནས་ཆུ་ཕྲན་གྱ་གྱུ་ཞིག་ཏུ་གྱུར་འདུག ངས་ཉིན་མོ་འདི་བརྗེད་མི་ཐུབ་པ་ཤེས་བྱུང་།   ༢༠༠༨ལོའི་ཟླ༡༢བའི་ཚེས༢༨ཉིན།

འཇིགས་པའི་ལེའུ། ༼ སྙན་ཚོམ ༽ དང་པོ། བོད་ནས་བྱུང་བའི་ས་ཡོམ།   ངུ་དངངས་བྱེད་པའི་ཁྱོད་ཀྱི་འགྲམ་དུ།   བདག་ལ་ནམ་མཁའ་ཁོ་ན་ལས་རང་དབང་གི་རྩེད་ཆས་ཤིག་མེད་པ་འདྲ་སྟེ བྱ་རྒོད་ཀྱི་གཤོག་པ་བརྐྱངས་ཤུལ་ནས་ད་གཟོད མེས་པོ་ཚོའི་གླུ་སྐད་དང་དེའི་རྟ་དབྱངས་ནས་ན་ཟུག་གིས་མངོན་པའི མར་མེ་ཚེ་འབར་དེ་མཐོང་ཐུབ།   འོད་དེའི་ཁུ་བ་མཚན་མོ་འདིའི་གཏིང་ཟབ་སར་འཁྱིལ་སོང་། ཕྱོགས་བཞི་མཚམས་བརྒྱད་གསལ་ཐག་ཆོད་ཀྱང་། གོ་མེད་ཚོར་མེད་ལ་དྭ་ཕྲུག་ཅིག་ལྟར་ སླར་ཡང་མུན་པའི་དོན་སྙིང་དང་བཅར་བའི་ང་ལ་མཚོན་ན།   སྨྲ་བྱེད་ཁ་ལས་ཐོན་པའི་བོད་ནི་ནམ་མཁའ་ཞིག ཁམས་ཡུལ་ཤུལ་ནི་དེ་ལ་ག་གཏད་དུ་ཡོད་པའི་རི་བོ་ཞིག   ཞོགས་པ་འདི་ལ། རྟེའུ་དཀར་པོ་ཞིག་གི་འཚེར་སྐད་གྲགས་བྱུང ཁྱོད་རང་རྦད་དེ་དྲན་པ་ཉམས།   གཉིས་པ། བརྙན་འཕྲིན་ནང་གི་ཡུལ་ཤུལ།   མགྲིན་པ་བརྣང་སོང་། ངག་གི་བྱིན་རླབས་ཡལ་སོང་། མིག་ཆུ་དཀག་སོང་། སེམས་ཀྱི་བློ་མིག་ལྡོང་སོང་།   གློ་བུར་ཏུ། ངས་མཐོང་བའི་ཡུལ་ལྗོངས་ཡོད་ཚད་ལ་ཁ་དོག་མེད་སོང ཁ་དོག་དེ་ལོ་རྒྱུས་རེད། མི་རེའི་སེམས་སུ་ཚོན་མདོག་སྣ་ལྔ་ཡོད། ངག་མི་སྨྲ་བར་ཡུན་རིང་དུ་བསྡད སྐད་ཅིག་དེ་ཉིད་ལ་ལོ་མང་པོ་ཞིག་འདས་སོང་།   ཆེས་རྗེས་མར་གློག་ཆད་སོང་། མུན་ནག་ལས་ང་ཡུན་རིང་ཞིག་ལ་གཉིད་དུ་ཡུར་སོང་།   གསུམ་པ། ས་ཆེན་གྱི་སྟེང་འོག   སེང་གེ་དེའི་གཡོ་ཟོལ་ལས་སྐྱེས་པའི་མཆེ་སྡེར་གྱིས ཅི་ཡང་མི་སེམས་པར་གངས་རི་འདིའི་བསྐལ་བ་མཐའ་འཇུག་གི ང་གདོང་ནས་རལ་བའི བྱི་དོར་མེད་པའི། རང་དབང་ངང་གང་སར་རྒྱུ་བའི་འོད་ཀྱི་ཕུང་བོར སྤར་བགྲད་ཐེངས་རེ་བྱས་ཀྱང   ཁྱོད་དང་རྒྱང་ཐག་རིང་ཙམ་ཡོད་པའི་ང་ཡིས མུ་མཐུད་དུ་དར་ལྕོག་རལ་བོ་ཞིག་གི་མདུན་ནས་འཇམ་ཐིང་ངེར་གནས་ཀྱིན་པ་དག་ལ རྒྱང་ལྟ་བྱེད་པའམ་གསོལ་འདེབས་བྱས།   ནམ་མཁར་རེག་པའི་བསང་དུད་སྔོན་པོ་ཞིག་རྟོག་བཟོ་བྱས་ཀྱང་ཆོག ཁོད་ཡངས་པའི་ས་གཞི་ནི་ཕྱི་འགྱོད་མེད་པར་གཞིས་ཁྱིམ་གྱི་ཚུལ་དུ་གནས།   འོ། ངའི་ཉི་མ། ངའི་ཟླ་བ།   བཞི་བ། མིག་ཆུའི་རྡོག་པ།   བུ་མོ་དེ་ངུས་བྱུང ཁོ་མོའི་སེམས་ཀྱི་གངས་རིའི་ངོ་བོ་འགྱུར་སོང གངས་རིའི་འདབས་ཀྱི་མི་རྣམས་འགྱུར་སོང ཁོ་མོ་གཉིད་ལས་སད ཁང་མིག་དོག་པོ་འདི་ལས་ཡར་ལྟ་མར་ལྟ་འགའ་ཞིག་བྱས་རྗེས ས་ཡོམ་གྱིས་མནར་བའི་རྫ་སྐྱེ་དགུ་དྲན་འོངས སླར་ཡང་ངུས་བྱུང   ལྔ་བ། གསང་བའི་ལྷག་བཅས།   ཁ་བའི་འདབ་མ་རེ་གཉིས་ས་ལ་ལྷུང རེ་གཉིས་ཁྱེད་ཀྱི་ངོ་གདོང་ནས་ཞི་བར་གྱུར།   བཅོས་སུ་མེད་པའི་དབེན་འཇགས་འདིའི་རྗེས་སུ ཁྱོད་ལ་ཚོད་ཚོད་དུ་གྲང་འདར་རེ་བརྒྱབ།   ན་ཟུག་དྲག་པོའི་ཁྲོད་ཁ་བ་འབབ་མཚམས་ཆད ཡིན་ཡང་མཐོང་ལམ་བཀག་ཡོད་ཚོད་ཡིན།   དྲུག་པ། ཉིན་ཐོའི་ངོས་གཞན་ཞིག   “བཟའ་རྒྱུ་དང་བཏུང་རྒྱུ་མི་འདུག ཉལ་ས་མི་འདུག དཀོན་མཆོག་གསུམ་པོ་མཁྱེན། ད་འཆི་ངེས་རེད།”   སྨྱན་བྱེད་ལས། ཁྱོད་ལ་ཟ་མ་རྒྱག་ཚད་ཅིག་བྱིན བཏུང་ཆུ་འདང་ཚད་ཅིག་གནང་། ཉལ་ས་དྲོན་མོ་ཞིག་བཅོས།   མཐའ་མར། མི་ཉུང་ཚད་ཅིག་ལ་འདས་ཆོད་སྒྲུབ།   བདུན་པ། སྒྱུ་མ་མཁན་གྱི་འཁྲབ་ཚན།   ཁྱོད་ཀྱི་ཁོད་ཡངས་པའི་རྩྭ་ཐང་ང་ལ་བྱིན། ཁྱོད་ཀྱི་རྟ་ནོར་ལུག་གསུམ་ང་ལ་བྱིན། ཁྱོད་ཀྱི་དྭངས་གཙང་གི་གཙང་ཆུ་ང་ལ་བྱིན། ཁྱོད་ཀྱི་མི་རབས་དུ་མ་བརྒྱུད་པའི་སྦྲ་ནག་དེའང་ང་ལ་བྱིན   ཁྱོད་གྲོང་ཁྱེར་དུ་སོང་། ཁྱོད་གྲོང་ཁྱེར་དུ་སོང་ནས་ལྡུམ་བུའི་རིགས་ཁ་ཟས་བྱོས ཁྱོད་གྲོང་ཁྱེར་དུ་སོང་ནས་སྲིན་འབུའི་རིགས་ཁ་ཟས་བྱོས ཁྱོད་དེང་རབས་ཟེར་བའི་གུས་པོ་དང་མཐུན་པར་བྱོས ཁྱོད་སྲོལ་རྒྱུན་ཟེར་བའི་འཕྱོན་མ་དང་རིང་དུ་གྱེས   ཁྱོད་གྲོང་ཁྱེར་དུ་སོང་ནས། རྫས་འགྱུར་གྱི་ཁ་རླངས་ཁྲོད་ནས་འཆི་བར་སྒུག ས་ཆུ་མེ་རླུང་གི་འཇིགས་པའི་ཁྲོད་ནས་འཆི་བར་སྒུག   བརྒྱད་པ། ཞར་བྱུང་གི་སེམས་ཁྲལ།    གཉིད་ལ་རོལ་དུས་ཀྱི་ཡུལ་ཤུལ གཉིད་ལས་སངས་དུས་ཀྱི་ཡུལ་ཤུལ   ལོ་མང་པོའི་རྗེས་སུ གཅིག་པ་གཅིག་འདྲ་ཞིག་ཡིན་ནམ།   དགུ་བ། གཤེགས་སུ་གསོལ།   ཡངས་པའི་སྤང་ལྗོངས་ཆེན་པོ་ནས་བྱ་རྒོད་ཀྱི་ལྡིང་སྐོར་རྒྱག   མཇུག་མཐའི་སྙིམ་པ་ནས་དལ་མོར་གཡོ་བའི་མཆོད་མེའི་འོད་མདངས་དེ་ཡིས ཁྱོད་ཀྱི་གཡས་གཡོན་གསལ་བར་བྱས་ལ། སེམས་ངོས་སུ་ཡལ་དཀའ་བའི ནང་མི་སྤུན་ཟླའི་ངོ་གདོང་སྐྱོ་བོ་དག་ཀྱང་གསལ་བར་བྱས།   སྐབས་འདིར། “ཡིད་སེམས་ཆགས་དགོས་པ་ཅི་ཞིག་ལུས་འདུག མིག་ཟུང་ནས་ཐོན་མ་ཐུབ་པའི་ཕངས་སེམས་ཀྱི་མཆི་མ་རྡོག་གཅིག་ཡིན་ནམ།”※   མགོ་ནག་བོད་པའི་སྐྱིད་སྡུག་གནམ་ལ་བཅོལ། གཤེགས་སུ་གསོལ།   མཆན། ※ སྐུ་ཞབས་ལྗང་བུའི་སྙན་ངག་ཅིག་ལས་ཁོལ་དུ་ཕྱུང་།

ད་ལྟ་བའི་ཡུལ་ཤུལ།   ཚིག་མཛོད་དང་གནའ་བོའི་དེབ་ཐེར་ལས་རྒས་པའི་མཛེས་སྡུག་གི་ཕུང་བོ ཚིག་མཛོད་ནི་མེ་ཡིས་གཞོབ་ཟིན དེབ་ཐེར་ནི་མང་ཚོགས་ཀྱི་གདོང་ལ་འབྱར་བའི་ས་རྡུལ་མཐུག་པོ་དེ་དང རྐང་རྫིས་གཏོང་གྱིན་པའི་འོད་ཀྱི་རྣམ་ཤེས་དེ་ཡིན་པའི་དབང་དུ་བཏང་ན ངའང་ཁྱོད་ཀྱི་ཕ་རོལ་ན་བརྡ་སྤྲོད་ཀྱི་ནུས་པ་ཆད་པའི གངས་རི་དཀར་པོ་དེ་མ་ཡིན་ནམ   ངེད་གཉིས་ངག་མི་སྨྲ་བར་ཡུན་རིང་བསྡད སེམས་སུ་ཅི་མི་སྙམ་ངང་ཁོད་ཡངས་པོའི་སྤང་ཐང་ཆེན་པོ་ཞིག་མངོན་བྱུང དེ་རུ་གླུ་གར་དང་ཟས་བཅུད་ཞིམ་པོར་རོལ་བའི ང་ཡི་བོད་མཐོང་བྱུང་།  ཡུལ་ཤུལ་མཐོང་བྱུང་།  སྐྱེ་དགུ་མདོ་མཐོང་བྱུང་། འཕྲོ་རིམ་འཕྲོར་ཉམས་སྣང་མང་པོ་ཞིག་མངོན་ནས གློ་བུར་ཏུ་ས་ཆེན་གྱི་བློ་མིག་ལྡོང་སོང་།  དད་པ་ཆེ་བའི་ངའི་ཕུ་ནུ་སྤུན་ཟླའི ངག་གི་འགྱུར་ཁུགས་བོར་སོང་།  བླའང་བོར་སོང་། ང་ཚོ་གང་དུ་འགྲོ།   མཐོ་སྒང་འདིའི་སྒལ་ཚིགས་སྟེང་འགྱིང་བའི རྒྱ་ནག་མ་ཎིའི་ཕ་ས། ད་ལྟ་ང་ཚོས་ལག་པ་བསྲིངས་ཏེ་རེག་ཐུབ་པ་ནི སྐད་ཅིག་པའི་རྡུལ་གྱི་ཕུང་བོ་དང་མར་མེའི་འོད་མདངས་མོག་མོག་ཁྲོད་བཞད་པའི མེ་ཏོག་རྐང་གཅིག་པོ་དེ་ལས་གཞན་ཅི་ཞིག་ཡོད མིག་ཆུའི་གདུང་འབོད་ཁྲོད་ནར་སོན་པའི་གེ་སར་གཉོམ་པོ་དེའི་སྟེང་དུ ཡང་སྙིང་ང་ཚོར་དབང་བའི་ཆོས་སྐྱོང་སྲུང་མ་ལགས་བཞུགས་ཡོད་དམ། ཨོ་རྒྱན་པདྨ་འབྱུང་གནས་ལགས་བཞུགས་ཡོད་དམ། རྗེ་ཙོང་ཁ་བ་ལགས་ཀྱང་བཞུགས་ཡོད་དམ།   ས་ཡོམ་བྱུང་རྗེས་ཀྱི་ནམ་མཁའ་ནི སྐྱ་ཟད་སྔོ་སྡུག་གི་རྩྭ་ཐང་ཞིག་དང་ཇི་འདྲའི་མཚུངས་ཨང ཁ་བའི་འབབ་ཞོད་ཆེ་བའི་ས་གཞི་འདི། གཤེགས་སུ་གསོལ། རྐྱང་དང་འབྲོང་ཁྱུ་རྒོད་པའི་ས་གཞི་འདི། གཤེགས་སུ་གསོལ། བྱམས་དང་སྙིང་རྗེས་ཁེངས་པའི་ས་གཞི་འདིའང། གཤེགས་སུ་གསོལ། འཇིགས་པ་འདིའི་གས་སྲུབ་རེ་རེ་ནས་བྱུང་བའི་སེམས་ཀྱི་འོ་དོད་དེ་དག་ནི ངའི་མིག་ཟུང་ནས་འགོ་བརྩམས་ཏེ སེམས་ངོས་སུ་ཁྲག་རྣག་ཏུ་གྱུར་སོང་།   གང་ལྟར།  མི་ལོ་དུ་མའི་རྗེས་སུ་ས་གཞི་འདིའི བདག་པོ་ཡིན་ཟེར་མཁན་གྱི་མི་ཞིག་ཐོན་ངེས་ཡིན། སྐབས་དེར། འཚེ་མེད་ཞི་བའི་ཉམས་སྣང་མང་པོ་ཞིག་ཀྱང་འཕྲོ་རིམ་འཕྲོར་ཐོན་ངེས་ཡིན ང་ཚོ་དང་རྒྱང་ཐག་ཉེ་ཙམ་ཉེ་ཙམ་དུ་འགྲོ་གིན་འདུག