སེང་རྡོར་ལ་ཕུལ་བའི་མེ་ཏོག་དམར་པོ།

ལྷ་ཡི་ཚོགས་ལ་དག་སྣང་མི་དགོས་མི་གཤིས་ཁམས་དྲུག་ལྡན་པའི་སྐུ། །

འདྲེ་ཡི་རིགས་ལ་དངངས་སྐྲག་མེད་པའི་སྒྲ་དབྱངས་ལྷ་མོའི་སྙན་ངག་སྒྲོགས། །

ལྷ་མེད་འདྲེ་མེད་ཚིག་གི་བརྗོད་ཀྱང་དོན་གྱི་ལྷག་བསམ་ཟླ་བྲལ་བ། །

ཕོ་རྒོད་ཁྱོད་ལ་བསྟོད་པའི་བསྔགས་བརྗོད་མེ་ཏོག་དམར་པོའི་མཆོད་ཕྲེང་འབུལ། །

ས་ཡ་དུ་མའི་མི་ཆེན་མང་དག་དུར་ཁུང་ཁྲག་དམར་དཀྱིལ་དུ་བཞག །

བརྒྱ་སྟོང་ཕྲག་གི་ན་ཆུང་བུ་མོས་བསྟན་འཛིན་དམ་པར་གཉའ་སྒ་བཏད། །

ང་བརྒྱད་རྒྱལ་གཅེས་ཅོལ་ཆུང་དཔའ་བོས་རང་ཕུང་རོགས་བརླགས་བཅོས་བསྒྱུར་བྱས། །

སྤྲེལ་ལད་ཕོ་མོ་དབང་ཆེན་རྣམས་ཀྱིས་ཕ་མེས་གསང་གསུམ་རྩད་ནས་གཏོར། །

གྲྭ་རྫུན་ཁྲམ་པའི་གྲྭ་རྟ་མ་བྱས་ཡིད་མཐུན་བུ་མོའི་རྗེས་སུ་རྒྱུགས། །

ཕྱོགས་ཞེན་གྲུབ་མཐའི་ཆགས་སྡང་མ་བྱས་རང་བློ་གཙང་མ་དབང་པོར་བྱས། །

དྲུག་ཅུ་རྒན་པོའི་ན་ཟུག་མ་བཟོད་ལྷ་ཕྲུག་ཕུར་བུའི་སྤུན་ཟླར་ལགས། །

ཕྱི་ནང་བསྟན་ལ་ཁྱད་པར་མ་བྱས་འཇིག་རྟེན་ཚོར་བའི་རྟུལ་ཕོད་བརྩམས། །

རང་དང་གཞན་ལ་དོགས་སློང་བྱས་ཏེ་སོ་སྐྱེའི་སྐད་སྒྲ་ལྷང་ལྷང་བསྒྲགས། །

རྒྱུ་ནོར་དཔུང་ལ་ངོ་སོ་མ་བལྟས་རང་གཤིས་དམར་པོ་རྗེན་དུ་ཕུད། །

ཐོབ་དང་གོ་ས་རོ་བཞིན་དོར་ནས་དྲ་ཁང་ནང་ནས་ཉིན་མཚན་ཉུལ། །

བསྟོད་སྨད་ཚོགས་ལ་བདག་གིར་མ་བྱས་རིང་ལུགས་བརྡ་སྤྲོད་བསྟན་པ་སྤེལ། །

རྒྱ་གར་ཡུལ་ནས་ཆོས་ཁུངས་མཐོང་ཡང་ལུང་ཙམ་སྐྱབས་འགྲོ་ཁྱོད་ལ་དབེན། །

ཙི་ནའི་ཡུལ་གྱི་རྒྱུ་ནོར་མ་རྔམས་ཀུན་རྟོག་སྨྱུག་རྩེར་སྙན་ངག་རྡོལ། །

ཕྱི་གླིང་ཡུལ་ནས་གཞན་མགོ་མ་བསྐོར་རང་གླིང་ཡུལ་ནས་རིགས་རྩལ་ངོམས། །

རང་ཡུལ་དཔའ་བོ་སེངྒེ་རྡོ་རྗེར་སྨད་པའི་ལམ་ནས་བསྟོད་པ་ལགས། །

ངོ་དགའ་ཚིག་གི་བསྟོད་དབྱངས་མ་ཡིན་ལོ་རྒྱུས་ཤེས་པའི་འབྱུང་གནས་ཡིན། །

སྒྲོ་བཀུར་ངན་པའི་འུར་སྒྲོགས་མ་ཡིན་དྲང་བདེན་ངེས་པའི་འཕྲིན་ཐུང་ཡིན། །

མིང་བྱང་མེད་པའི་རྐུན་ཇག་མ་ཡིན་དགྱེས་པ་རྡོ་རྗེའི་ལེགས་སྐྱེས་ཡིན། །

ཨུ་ཚུགས་བསྒྲིག་པའི་ཚིག་བཅད་མ་ཡིན་དབང་མེད་སོར་བཅུའི་ལམ་ནས་ཐལ། །

སྤྱི་ལོ་༢༠༡༠ ༤ ༤ ལ་ཝྰ་ཡེལ་ཇ་ཁང་ནས་དཔལ་དགྱེས་པ་རྡོ་རྗེས་ཐོལ་བྱུང་དུ་མྱུར་བྲིས་བགྱིས་པ་དགེའོ། །