ཁམས་འདྲི་དང་བཅས་ཞུ་དོན།

འདིར་དཔྱོད་ལྡན་པ་སེང་རྡོར་ལགས་ཀྱིས་རང་གིས་བསྒྲུབས་པའི་དྲ་བ་ཉམས་གསོ་བྱས་པ་དང་ལྷན་དུ་བདག་ལའང་མདུན་ངོས་ནས་ས་མིག་ཅིག་གནང་སྟེ་ཀློག་མཁན་དང་བོད་ཡིག་གིས་འབྲེལ་བ་བྱེད་པར་སྟབས་བདེ་བཟོས་པར་སྙིང་ཐག་པ་ནས་བཀའ་དྲིན་ཆེ་ཞུས་པ་ཡིན་ལ་སྐུ་ཞབས་ཁོང་གི་དྲ་བ་འདི་ཉིད་གོད་ཆག་ཅི་ཡང་མེད་པར་ཡུན་དུ་གནས་པའི་སྨོན་ལམ་ཡང་བཏབ་པ་ཡིན། 

    དེང་གི་དུས་རབས་འདི་ནས་བཟུང་། རང་རེའི་དབྱངས་གསལ་སོ་བཞིར་ཡང་ཚན་རྩལ་གྱི་རྒྱན་གོས་གསར་བ་བཀླུབས་ནས་རང་གི་མཛེས་སྡུག་ངོམ་པའི་སྐལ་བཟང་མངོན་དུ་གྱུར་ཅིང་མ་འོང་བ་ན་དེ་ཡི་རྫོགས་ལྡན་གྱི་དུས་ཤིག་ཀྱང་ཤར་བའི་ཡིད་ཆེས་བདག་ལ་ཡོད། 

    མི་ཆུང་བདག་ལ་མཚོན་ན། འཇིག་རྟེན་འདིའི་ངོ་བོ་དང་སྙིང་བོ། མི་ཚེ་འདིའི་འགྱུར་བ་དང་སྡུག་བསྔལ་ལ་དཔག་གིན་གང་ལའང་མི་ཞེད་མི་འཛེམ་པར་སྙན་ངག་དང་བརྩམས་སྒྲུང་སོགས་སུ་འབོད་པའི་འཁྲབ་སྟོན་དེ་རིགས་ཀྱི་ནང་དུ་མགོ་འཐོམས་པས་ན་རང་གི་འཚོ་བ་དངོས་དང་དེའི་ཁྲོད་ཀྱི་རྩེད་འཇོ་དང་སྤྲོ་དགའ་སོགས་ཀློག་མཁན་ཚོར་ངོ་སྤྲོད་པར་གོམས་མེད་ནའང་འདི་འདྲའི་སྟེགས་བུ་གསར་བ་ཞིག་འཐོབ་ཚེ་རྗེས་མར་འདིའི་ཁ་རྩོམ་རིག་བརྩམས་ཆོས་ཀྱི་མི་བཀང་བར་ཀུན་ལ་ལྷོད་ཡངས་ཀྱི་ཚོར་བ་ཞིག་སྟེར་བའི་ཆེད་དུ་བྲི་འདོད་པ་དག་འབྲི་ཐབས་གསར་བས་བྲི་རྒྱུར་འབད་པ་བྱ་ངེས་པ་ཐུགས་ལ་ཟུངས། བཀྲ་ཤིས་པར་གྱུར་ཅིག