གསལ་བཤད་དང་སྤྱི་བསྒྲགས།

སེང་རྡོར་དྲ་བ་སྐྱེ་བ་ཕྱི་མ་ནས་བར་དོ་དང་བར་དོ་ནས་ཚེ་འདི་ལ་ལུགས་ལྡོག་གིས་ཚུལ་དུ་འོང་བ་ནི་འདས་ལོག་ཅེས་པའི་ཐ་སྙད་འདི་དང་ཁ་ལྷན་དུ་འབྱོར་འདུག་པས། ནང་མི་དག་གི་སེམས་ཀྱི་སྐྱོ་བ་དེ་སྤྲོ་བའི་ངང་དུ་འཕེལ་ཞིང་། ལག་པས་ཐལ་མོ་རྡེབ་པ་ཙམ་གྱིས་མི་མཚོན་པ་དང་། གདོང་ལ་འཛུམ་མདངས་ཤར་བ་ཁོ་ནས་མི་འཁྱོགས་པའི་ཚུལ་དུ་འཁོར་བཞག བསམ་བློ་རེ་བཏང་ན་དེ་ལོས་ཀྱང་ཡིན། བོད་སྐད་ཡིག་ཟིན་བྲིས་དང་ཧི་གཟུགས་ཟིན་བྲིས་སོགས་གཅེས་ལོ་མེ་ཏོག་གི་འདབ་མ་མ་རྙིང་བ་དག་ལག་ནས་འཕྲོག་ཅིང་། བླ་འགུགས་དང་ཚེ་འགུགས་ཀྱི་རིམ་གྲོ་ཅི་ལྟར་བསྒྲུབས་ཀྱང་ཕྱིར་འོང་མེད་སོང་བས་ངེད་ཅག་ཀུན་པོའི་སྙིང་ཁམས་མི་བསང་བ་དང་མི་བདེ་བའི་ངང་དུ་ཡོད་དུས་སུ། རེ་བའི་མིག་འབུར་གཏོད་ས་གཅིག་བུར་གྱུར་བའི་སེང་རྡོར་དྲ་བར་ཡང་གློ་རྡེག་ལ་མི་མ་ཡིན་གྱི་གདོན་གྱི་འཚེ་བས་ལག་བསྟར་དངོས་སུ་བྱས་པས་མི་སྐྱིད་པའི་སྟེང་དུ་མི་སྐྱིད་པ་བརྩེགས་བྱུང་པར་བསྟུན་ངེད་ཅག་ལ་མེད་དང་མུ་གེ་ཡི་ཐལ་བ་སྐྱ་སེང་ངེར་འཐིབས་ཤིང་། ཡུག་ས་མོའི་བྱད་བཞིན་ལྟར་ཡ་ང་བ་ནས་ཉམ་ང་བར་ལྷུང་གིན་པའི་དུས་སུ། སྐུ་ཞབས་སེང་རྡོར་གྱི་འབད་པ་ལ་བསྟུན་ནས་སྤྱང་ཀིའི་མཆེ་བར་ནས་ལུ་གུ་འཕྲོག་པ་བཞིན་རང་ཁྱིམ་རང་ལག་ཏུ་འོང་བའི་རྒྱལ་ཁ་འདི་སུ་ལ་བཤད། བཤད་པས་མི་མཚོན་དགའ་བ་འདི་སུ་ཡིས་ནོན།