ཁ་བ་ལེབ་མོ་ཞིག་ལས་མཐོང་བའི་འཇིག་རྟེན།

ཁ་བ་ལེབ་མོ་ཞིག་ལས་མཐོང་བའི་འཇིག་རྟེན།

ཁ་བ་ལེབ་མོ་དག་རི་རྩེ་རུ་བབས་བྱུང་ན་གངས་ཀྱི་རི་བོ་ཞིག་ཏུ་འགྲུབ་སྟེ།གངས་རི་མཐོན་པོ་ཞིག་ཉིལ་བྱུང་ནའང་ཁ་བ་ལེབ་མོ་ཞིག་ལས་མེད་པ་བཞིན།

གངས་རི་ནི་སྤྱི་ཚོགས་ཤིག་ཡིན་པའི་དབང་དུ་བཏང་ན།ཁ་བ་ལེབ་མོ་དེ་ནི་སྤོབས་ཉམས་ཀྱིས་ཕྱུག་པའི་ན་གཞོན་ཞིག་ཡིན་སྲིད།

ང་ཚོས་གངས་རི་ཡི་རྔམ་བརྗིད་དང་གཏོས་ཆེ་བའི་ཕུང་བོ་དེ་མཐོང་བ་ལས་གཞན། ཁ་བ་ལེབ་མོ་ཞིག་ལ་བསམ་བློ་བཏང་མ་མྱོང་བ་འདྲ་སྟེ།ཁ་བ་ལེབ་མོ་དེ་ཡོད་པས་ད་གཟོད་གངས་རི་ལའང་རང་ཉིད་ཀྱི་བླ་སྲོག་ཡོད་པར་གྱུར།

འཇིག་རྟེན་གྱི་བར་སྣང་ཉུལ་བའི་ཁ་བ་ལེབ་མོ་དེར།རེག་བྱ་གྲང་ངར་དང་ལྡན་པ་ནི་ཁོ་རང་གི་གཉུག་གཤིས་དག་མ་དེ་ཡིན་ལ།ཁོ་རང་གི་ཐུན་མིན་གྱི་འཚོ་སྟངས་དེའང་ཡིན་ནོ།

ངས་རྒྱུན་དུ་གངས་རི་དང་རླུང་འཚུབ་གཉིས་ཀྱིས་རྒྱན་འཇོག་པ་མཐོང་ཞིང་།རྒྱན་འཇོག་གི་ནང་དོན་གང་ཡིན་ཆ་མི་འཚལ་ནའང་གངས་རི་ནི་རྒྱུན་དུ་ཕམ་ཁ་ཉོ་མཁན་དེ་ཡིན་པ་སྟེ།ཕམ་ནས་དབུ་ཞྭའང་མེད་པར་གྱུར་དུས།ད་གཟོད་གངས་རི་ནི་ཁ་བ་ལེབ་མོ་ཞིག་ཡིན་པ་ཤེས་སོང་།

དྲང་གནས་བཤད་ན་ཁ་བ་ལེབ་མོ་ནི་གངས་རི་ཡི་ཚེ་སྲོག་བརྟེན་པའི་བླ་ཡིན་ཏེ།གངས་རི་མཐོན་པོ་ནི་རྔམས་མཐུག་ཅིང་རྫོབ་སྟུག་པའི་དཔེ་ལྡེབས་ཤིག་ཡིན་པའི་དབང་དུ་བཏང་ན།ཁ་བ་ལེབ་མོ་དེ་ནི་དཔེ་ལྡེབས་དེའི་དོན་སྙིང་དང་བརྗོད་བྱའི་སྲོག་ཡིན་དགོས།

ཁ་བ་ལེབ་མོ་རེ་རེ་ནི་གསལ་བྱེད་སུམ་ཅུའི་སྲོག་ཏུ་ཞུགས་པའི་དབྱངས་ཨ་ཞིག་དང་འདྲ་བར།གངས་ཀྱི་རྦབ་དྲག་པོའི་སོར་རྩེ་ནས་བརྗེས་པའི་དཔེ་ལྡེབས་ཀྱི་ཤོག་ཕྲེང་རེ་རེ་ཡིན་ལ།ཁ་བ་ལེབ་མོའི་ཕྲེང་བ་ཚར་དུ་དངར་བ་དེས་གཞི་ནས་ཕུན་སུམ་ཚོགས་པའི་རྩོམ་གྱི་སྒྲོམ་གཞི་རེ་རེ་གྲུབ་ཡོད།

ཁ་བའི་རྩོམ་གཞི་དེ་དུས་རབས་ཀྱི་བཞུར་རྒྱུན་ཀློང་དུ་འོད་ཀྱིས་འཚེར་མིན་ནི་ཁ་བའི་ནུས་སྟོབས་ལ་རག་ལས་ཏེ།གལ་སྲིད་ཁ་བ་ལེབ་མོ་རེ་རེ་རང་སའི་བར་སྣང་དུ་འཕུར་ཅིང་།གལ་སྲིད་གངས་ཀྱི་རི་བོ་ཉིད་ནི་ཤོག་བུ་ལྡེབས་གཅིག་ཡིན་པའི་དབང་དུ་བཏང་ན།དེ་ན་གངས་རི་གང་ཞིག་ཡིན་ཀྱང་ཀློང་ཡངས་པའི་བརྗོད་བྱ་འདི་དག་འཛིན་ནུས་བྲལ།

ངེད་ཅག་གིས་གངས་རི་བྱ་བའི་ཚིག་མཛོད་འདི་ལས་མངར་བ་འམ་སྐྱུར་བ་འམ།ཁ་བ་འམ་ཚྭ་བའི་བྲོ་བ་རེ་རེ་རྙེད་ཅིང་།ལོ་རབས་ནས་ལོ་རབས་སུའང་ཚིག་མཛོད་འདི་ཉིད་ལས་རང་ཉིད་ཀྱི་ལས་ཀྱི་པྲ་དང་གཤེད་ཀྱི་བདུད།གཡང་གི་ཕྱྭ།སྲོག་གི་རྟ་རེ་རེ་བཞིན་འཚོལ་དགོས་བྱུང་ཡོད།

དོན་དངོས་ཐོག་གངས་རི་ཡིས་ཁ་བ་ལེབ་མོ་དག་ལ་སྲོལ་རྒྱུན་གྱི་སྒྲིག་སྲོལ་ཞིག་བཟོས་ཡོད་དེ།དཔེར་ན་ཁ་བ་ལེབ་མོ་རེ་རེ་བཞིན་ཚེ་ཚེ་རབས་རབས་སུ་མཐུན་སྒྲིལ་བྱས་ཏེ་རང་ཉིད་ཀྱི་རྩིབས་མ་དག་དམ་དུ་སྦྲེལ་དགོས་པ་དང་།རྐྱེན་མེད་དུ་འུར་ཟིང་མི་བཟོ་བ།ཉི་མ་དང་ཟླ་བའི་བསླུ་བྲིད་འོག་ཏུ་རང་ཉིད་ཀྱི་མིག་ཆུ་གང་དགར་མི་གཏོར་བ་སོགས་ཀྱི་སྤྱོད་ལམ་བཟོས་ཡོད།

ཡིན་ནའང་ཁ་བ་ལེབ་མོ་ནི་ཁ་བ་ལེབ་མོ་སྟེ།འབྱུང་བཞིའི་རྡུལ་ལས་གྲུབ་ཅིང་ཚ་གྲང་དབུགས་ཀྱིས་འཚོ་བའི་སྲོག་ཆགས་ཤིག་ཡིན་པའི་ཆ་ནས་གངས་རིའི་སྒྲིག་སྲོལ་གྱིས་དམ་དུ་སྒྲོག་ནུས་པའི་དབང་ཤེད་ཀྱང་ཡེ་ནས་མ་མཆིས་སོ།

དཔེར་ན་གངས་ཀྱི་རྦབ་ལས་འདྲིལ་བའི་ལས་འགུལ་རེ་རེ་ཡང་རང་དབང་ལ་སྙེགས་པའི་ཁ་བ་ལེབ་མོ་དག་གི་ངོ་རྒོལ་དང་དགག་བཞག་ཡིན་ལ།དྲག་རྩུབ་རླུང་དང་འདྲེས་པའི་མཆོངས་བསྐྱོད་རེ་རེ་ཡང་ཁ་བ་ལེབ་མོ་དག་གི་འབྱུང་འགྱུར་ལ་དམིགས་པའི་ཐ་ཚིག་དང་ང་རོ་ཡིན་འདུག

གངས་རི་ལ་སེམས་བྱ་བ་ཞིག་ཡོད་མེད་མི་རྟོགས་ལ།གངས་རི་ལ་བརྩེ་དུང་དང་ལ་རྒྱ་བྱ་བ་ཞིག་ཡོད་མེད་ཀྱང་མི་རྟོགས་མོད།གངས་རི་ནི་གངས་སྦལ་བཞིན་མདོག་འགྱུར་སླ་བའི་མི་གཤིས་ཉིས་སྦྲགས་ཀྱི་མཚན་གཉིས་མ་ནིང་ཞིག་ཡིན་པ་འདྲ་སྟེ།ཉི་མ་དམར་པོའི་སྐྱིབས་འོག་ཏུ།གངས་རི་ནི་དྲོད་འཇམ་ལ་རེ་བའི་བགྲེས་མོ་ཞིག་དང་འདྲ་བར་མིག་ཆུ་མང་ལ།ཟླ་བ་དཀར་བོའི་བྱིལ་བྱིལ་འོག་ཏུ།གངས་རི་ནི་དུས་གསུམ་རྟོགས་པའི་བགྲེས་པོ་ཞིག་དང་འདྲ་བར་སྒམ་ཚུགས་ཤིན་ཏུ་ཆེ།

དེ་དག་གི་སྐབས་ན་ཁ་བ་ལེབ་མོ་དག་གིས་ནུས་པ་གང་འདྲ་ཞིག་འདོན་བཞིན་ཡོད་དམ།གལ་སྲིད་ཁ་བ་ལེབ་མོ་འདི་དག་མེད་ན་གངས་རི་ལ་ནམ་ཡང་གངས་རི་འབོད་མི་སྲིད་ལ།ཁ་བ་ལེབ་མོ་འདི་དག་མེད་ཚེ།གངས་རི་ལ་ད་དུང་ཁ་དོག་དང་འོད་མདངས་ཤིག་ཀྱང་ཡོད་སྲིད་དམ།

གངས་རིའི་གནས་མཇལ་དུ་འགྲོ་ཐེངས་རེ་རེར།ཁོ་བོས་གངས་ཀྱི་ནགས་ཚལ་དུ་འཚོ་བའི་སྒོ་ཕྱུགས་རེ་རེ་བཞིན་མིག་གིས་མཐོང་ཞིང་རྣ་བས་ཐོས་ལ།དེ་དག་རེ་རེའི་མིག་ཁོངས་སུ་འཁྲིགས་པའི་དབུལ་ཕོངས་དང་བཀྲེས་ལྟོགས་ཀྱི་དཀའ་ཚེགས་རེ་རེའང་ལུས་ཀྱིས་མྱོང་དགོས་བྱུང་།

དེ་དག་གི་ཁྲོད་ན་མགོ་སྒུར་ལྕེ་སྣར་གྱིས་འཚོ་བའི་གཡག་དང་།སྒ་སྲབ་སྒྲོག་རྨེད་ཀྱིས་བཅིངས་པའི་རྟ་ཕོ།གཡུང་ཞིང་དད་མོས་ཀྱིས་བཀུགས་པའི་ལུག་ཁྱུ་ཡོད་པར་མ་ཟད།ལྕགས་ཐག་རྣོ་ཕུར་གྱིས་བཏགས་པའི་བྲན་ཁྱིའང་ཡོད་འདུག་སྟེ།དེ་དག་རེ་རེའང་མ་གཞིར་འོད་ཀྱིས་འཚེར་བའི་ཁ་བ་ལེབ་མོ་རེ་རེ་ཡིན་སྲིད་མོད།ད་ནི་མདངས་ཡལ་ཞིང་ལུས་སྲོག་སྐམ་ལ་ཉེ་འདུག

ཡང་ན་མི་རེ་རེའི་སེམས་ཀྱི་གཏིང་རིམ་ནའང་གངས་རི་རེ་ཡོད་དུ་སྲིད་དེ།ལུས་ཀྱི་ཕྲ་ཕུང་དཀར་པོ་དང་ཕྲ་ཕུང་དམར་པོ་རེ་རེའང་དབྱིབས་དང་རྣམ་པ་མི་འདྲ་བའི་ཁ་བ་ལེབ་མོ་རེ་རེ་ཡིན་སྲིད།ཡང་ན་ཁ་བ་དེ་དག་གིས་སྔར་ནས་འོད་ཀྱིས་ཁེངས་པའི་གངས་རི་ཞིག་གྲུབ་ཟིན་ལ།གངས་རི་དེ་ཡང་ཁ་བ་ལེབ་མོའི་གཞི་རུ་གྲུབ་པའི་སྲོག་ལྡན་གྱི་ན་གཞོན་ཞིག་ཡིན་སྲིད།

གང་ལྟར་རང་སེམས་ཀྱི་ཁ་བ་མ་ཞུ་ན།གངས་རི་ཡི་བླ་སྲོག་སྐམ་མི་སྲིད་པ་ཁོ་བོས་སྔར་ནས་ཤེས་ཡོད།

༢༠༡༠ལོའི་ཟླ༤པར་གསེར་རྟ་ནས།