ས་སྲོད་ཀྱི་སྐྱོ་སྣང་རུམ་པའི་ཆུ་ཕྲན་གྱི་དབྱངས་རྟ་ཐུང་ངུ།

ཟླ་བ། སྤྲིན་གཟེབ་ཏུ་ཧད་དེ་ཡུན་རིང་གོར་སོང་བའི་མཚན་གུང་དུ།
འཁྱག་རླུང་གི་སྒུལ་ཚུལ་ཞིག་ལས་ནམ་མཁའ་ཧྲིལ་བོ་འདར་འདར་བྱེད་པ་དང་མཚུངས།
མར་མེ་ཆུང་ཆུང་ཞིག་གི་སྲོག་ཐག་ལས་སྙི་དྲགས་པའི་ཁྱོད་ཀྱི་ལས་དབང་འདི།
མཚན་མོ་རྟག་པར་མུན་པའི་འཇིངས་སྲུབ་ན་ཧ་ཅང་གཉོམ་དུང་གིས་འཚོ།
 
ས་སྲོད་ཀྱི་སྐྱོ་སྣང་རུམ་པའི་ཆུ་ཕྲན་གྱི་དབྱངས་རྟ་ཐུང་ངུས།
ཨ་མའི་མིག་ཆུ་རྡོག་རེ་སྒྱུ་འཕྲུལ་གྱི་ལྷ་ཞལ་ལ་གཏོར་དུས།
ཟིལ་བ་འཛུམ་པའི་བྱང་ཐང་གི་མེ་ཏོག་ཚོམ་བུ་འགའ།
མུན་ནག་གི་ས་གཞི་རུ་སྔར་བས་མཛེས་སྡུག་གིས་བཞད།
 
ལོ་ཟླ་ནི་ཁ་བའི་འདབ་མར་དཔར་བའི་ཚོན་མདངས་ཀྱི་ལྡེབས་རིས་བཞིན།
རེ་གསལ་རེ་མོག་ངང་མཚོ་མོའི་འཕྱོ་འཇགས་ཀྱི་བྲང་ཁར་འཁྱིལ་ཅིང༌།
གཏམ་རྒྱུད་ཀྱང་ཉི་འོད་དང་རླངས་སྤྲིན་འཐབ་པའི་དབང་གཞུ་ལྟར།
བར་སྣང་དང་མུན་པའི་བར་གླེགས་ན་གདོད་མའི་རང་གཤིས་བརླགས།
 
མེས་པོའི་ཟུངས་ཁྲག་གི་མདངས་སུ་འཚེར་བའི་མཚམས་སྤྲིན་གྱི་བླ་འགབ་འོག
ཞེ་གནག་གི་རྔོན་པ་དེ་རི་སྤྱང་གི་རྔམ་སེམས་ཁུར་ནས་བོའུ་ཁ་གང་ཞིག་ཏུ་སྡིགས་བཞིན་ཡོད་ཨང༌།
སུས་ཀྱང་མ་རིག་པའི་གྲུ་ཟུར་དེའི་གསལ་སྒྲིབ་དང་སྨྲེང་སེམས་ཐན་ཐུན།
སྤྲིན་ནག་ལ་རྡུང་ཁ་ཐེབས་པའི་ཕུག་རོན་དཀར་མོའི་མགྲིན་དབྱངས་ལས་ལྷང་ངེ་ལྷང་ངེར་ཐོས་ངེས།