ཁྱོད་ཚོས་གྲངས་ཀ་རྩིས་དང་། ཁོ་བོས་བྱ་དགའ་སྟེར་ཆོག

___ སེང་རྡོར་གྱིས་རང་ཉིད་དང་བཅས་པར་བྱ་དགའ་སྤྲད་ཡོད།

རྒྱལ་གཉེར་ཚགས་དེབ་མང་པོའི་མཐའ་རོལ་དུ་སྐྱེས་པའི། །
གཞུང་བཙུགས་སྨྱན་བྱེད་མང་པོའི་རྒྱབ་ལོགས་སུ་འབུས་པའི། །
དམར་ཕྱོགས་བྱ་འགུལ་མང་པོའི་གཞོགས་ཟུར་ནས་སྨིན་པའི། །
དགུན་གྱི་སྐྱེ་དངོས་འོ་ཅག་སྐལ་བ་གཅིག་བཟང་བྱུང་། །

དེ་རིང་སྲིད་པའི་གངས་རྒན་དཔང་བོ་རུ་བཞག་སྟེ། །
ཁ་འབབ་ཆུ་བོ་རྣམ་བཞི་ཟུར་མཉན་དུ་བསྐོས་ཏེ། །
འཁྱམས་པོ་ཁ་གསལ་འབུམ་གྱི་གྲོགས་དན་དང་བཅས་ཏེ། །
བདེན་འཛིན་རྟགས་མ་ཆེན་པོ་སེམས་ནང་དུ་འཇོག་རྒྱུ། །

ཕ་མེས་དགུ་བརྒྱུད་རིང་གི་ཆང་རྙིང་ཞིག་ཡོད་དེ། །
སློབ་དཔོན་ནམ་མཁའ་ནོར་བུས་ཞབས་དག་ཏུ་བཞེས་དགོས། །
དུས་ཀྱི་ལོ་རྒྱུས་སྨྲ་བ་དཔའ་ཤོས་སུ་འགྲོ་ཞེས། །
འདི་ན་གཡུང་དྲུང་སྒོ་བཞིའི་བྲང་རྟགས་ཤིག་འབུལ་རྒྱུ། །

གཉན་རྒུའི་དོང་རིང་སྤྲུགས་པའི་ལག་རྗེས་ལ་བལྟས་ན། །
གཤེད་བརྒྱའི་གདོང་འབག་དྲལ་བའི་ས་ཆོད་ལ་གཞིགས་ན། །
བདག་ཡིག་འབུར་དུ་བརྐོས་པ་གསེར་སེར་གྱི་པིར་འདི། །
ཞོགས་དུང་ཉི་གཞོན་སོགས་ལས་མཛའ་ས་ཞིག་མེད་འདྲ། །

སེམས་ཆུང་སྡེ་བས་ཐུ་བྷོད་བསྡུས་གཟུགས་སུ་བཏབ་ཡོད། །
གེ་སར་རྟ་རྫིས་གངས་ལྗོངས་ཐིག་རིས་སུ་བྲེས་ཡོད། །
གཞས་ཚིག་ཁོ་ནས་སྒང་དྲུག་འཐོར་མེད་དུ་བསྡམས་པའི། །
གངས་བུ་དགའ་སྐྱེད་ཙོང་ཁའི་ན་རོ་རུ་བསྐོས་འགྲོ །

སྒོ་ཤེར་ཆོས་སྲིད་འབྱེད་པའི་དྲང་ཤིང་དུ་ཉེ་ཙམ། །
མདའ་སྨྱུག་ལྷ་རིག་བཞུ་བའི་དམྱལ་མེ་རུ་འགྲོ་ཙམ།།
སྨིན་དྲུག་གངས་ཐིག་འདེད་པའི་ལམ་ཡིག་ཏུ་འཐད་ཙམ། །
བཀུར་འོས་གདན་ཐོབ་ཡོད་ན་ཁོ་ཅག་ལ་སྟེར་དགོས། །

ལྗང་བུ་ཚིག་གྲུབ་སྟོང་གི་སྤྱི་ཕུད་དུ་འབར་ཡོད། །
སྐྱབས་ཆེན་རྟོག་བརྙན་འབུམ་གྱི་ཉིང་ཏིག་ཏུ་དྲིལ་ཡོད། །
གེའུ་བརྡ་བྱེད་ཁྲི་ཡི་ཡང་ཞུན་དུ་འཁྱིལ་ཡོད། །
བསྔགས་འོས་མཚན་སྙན་ཡོད་ན་ཁོ་ཅག་ལ་སྒྲོན་རོགས། །

ཐེའུ་སྒྲེན་ཞོགས་གདོན་ལ་སོགས་ཕོ་ཤར་གྱི་ཚོགས་ཤིག །
བོད་གཟུངས་ཁ་བ་ལ་སོགས་མོ་གཞོན་གྱི་ཁྱུ་ཞིག །
འོད་དཀར་གངས་ཉི་ལ་སོགས་རྟུལ་ཆེན་གྱི་སྐོར་ཞིག །
བྱ་དགའི་རྣམ་གྲངས་འདི་ཡི་རྟིང་གནོན་དུ་འཕར་དགོས། །

བཅད་མའི་ཚིག་གི་རི་རྩེ་སྤྲིན་གསེབ་ཏུ་ཚུགས་ཤིང། །
ཆོས་རྙོག་དཀྲུགས་པའི་སྙིང་ཁམས་བདུད་རྒན་ལྟར་སྲ་བའི། །
སྐལ་འདི་གཞོན་པ་རང་གིས་ལག་བསྲིངས་ཀྱིས་ཁྱེར་འགྲོ །
འུག་ཆུང་སྐྱིད་པོ་མེད་ན་རྩལ་འགྲན་དུ་ཕེབས་ཤོག །

གཞན་ཡང་གྲགས་པ་མེད་པའི་སྦས་ཚུལ་གྱི་མཁས་པ། །
ད་དུང་བརྩམས་པོད་མེད་པའི་གབ་ཚུལ་གྱི་དམ་པ། །
གངས་རིའི་བླ་འགབ་གཉིས་སུ་ཡོད་ཡོད་དུ་ངེས་པས། །
དགེ་བའི་གཟེངས་སྐྱེས་མང་ཤོས་ཁོ་ཅག་ལ་བསྐྱུར་དགོས། །

ཤར་ཕྱོགས་དུང་རི་བོད་ཀྱི་མགྲིན་ཚབ་ཏུ་འགྲོ་ཚོད། །
ན་གཞོན་གསར་བ་བོད་ཀྱི་མིག་ཚབ་ཏུ་འཐད་ཚོད། །
གང་ལྟར་སྲོག་གིས་འགྲེང་བའི་སྣག་རིས་ཀྱི་ལས་དག །
བསྔགས་ཚིག་འབུམ་གྱིས་བཀླུབས་ཀྱང་ནོངས་དགོས་ཤིག་ཅི་ཡོད། །

༢༠༠༩  ༡༢  ༡༦